АҚШ-тың 47-інші президенті Дональд Трамптың импортқа қатысты жүргізіп жатқан екпінді саясатына қатысты алаңдау және геосаяси тұрақсыздықтар әлемдік нарықта белгісіздікті күшейтіп, алтын бағасының тарихи максимумдарға жетуіне себеп болып отыр.
Алтын ұзақ мерзімді өрлеу кезеңінде
Marketwatch порталының мәліметінше, Allegiance Gold компаниясының операциялық директоры әрі негізін қалаушылардың бірі Алекс Эбкарянның айтуынша, алтын ұзақ мерзімді өрлеу толқынында тұр. Маманның айтуынша, нарық тіпті АҚШ мемлекеттік облигацияларының өсімін де елемей отыр.
«Керісінше, алтын макроэкономикалық қауіптерге, атап айтқанда, тұтынушылар сенімінің төмендеуі, тұрақты инфляция, жұмыс орындарының қысқаруы және АҚШ-тың импорттық тарифтерге қатысты белгісіздігі сияқты факторларға жауап қатуда», – деп толықтырды сарапшы.
Алтын бағасы S&P 500 индексінің құлдырауы аясында өсіп жатыр
Алтын бағасының қымбаттауы АҚШ-тың қор нарығындағы құлдыраумен тұспа-тұс келді. Соңғы айда S&P 500 индексі шамамен 10%-ға төмендесе, тек өткен аптада (7-13 наурыз) бұл көрсеткіш 4,3%-ға құлдырады.
Дүниежүзілік алтын кеңесінің (World Gold Council) мәліметіне сүйенсек, 2024 жылы алтын бағасы 40 рет жаңа рекорд орнатқан.
Теңгеге шаққандағы 1 грамм алтын бағасын мына сілтемеден білуге болады.
