Android XR: Google технология кеңістігін кеңейтіп жатыр
Google компаниясы Samsung және Qualcomm-мен бірлесіп істеген Android XR атты жаңа операциялық жүйені таныстырды. Жүйе жасанды инттелект, AR және VR мүмкіндіктерін кіріктіріп, ақылды көзілдірік сынды XR (extended reality) құрылғылардың әлеуетін кеңейтпек.
Осы уақытқа дейін біздің технологиямен қарым-қатынасымыз тікбұрышты экранмен, яғни монитор, ноутбук, телефонмен шектелді. Алайда технологияның қарыштап дамуы әрі оның қолжетімді болуына байланысты бұл шекаралар едәуір кеңейді.
Google компаниясының кезекті жаңа өнімі — Android XR операциялық жүйесі жұмыс, білім алу және шығармашылық үшін кеңейтілген мүмкіндіктерді ұсынады. Операциялық жүйе Marvel фильмдерінде IronMan киген ақылды көзілдірік секілді адамның виртуал әлем өнімдерін шынайы өмірден ажырамай пайдалануына жол ашады.
Қазіргі таңда тестілеуден өтіп жатқан Android XR көзілдіріктері күнделікті өмірге ыңғайлы шешімдер ұсынады. Мәселен, көзілдірікті тағып алып, жол бағдарын сызуға, бейнелі аударма жасауға және хабарламаларды қарауға болады.
Видео қайнаркөзі: Google
Android XR жүйесінде жұмыс істейтін алғашқы құрылғылар, соның ішінде Samsung компаниясының Project Moohan (бүркеншік атау) гарнитурасы 2025 жылы нарыққа шығады. Құрылғыны басқару, жоспарлау және ақпарат іздеу сияқты тапсырмаларда Gemini AI көмекші болмақ. Одан бөлек, YouTube, Google TV, Google Maps және Chrome сияқты қосымшалар жаңа форматқа бейімделіп, Circle to Search сынды жаңа функциялар да жүйеге енбек.
Google командасының Android XR жүйесін таныстыруы
Операциялық жүйе және оның мүмкіндіктері туралы толығырақ Android XR сайтынан білуге болады.
