Сэм Альтманның жетекшілігіндегі OpenAI жаңа 40 миллиард долларлық инвестиция раундын аяқтап, компания құнын екі есеге жуық арттырды. Енді ол әлемдегі ең қымбат жеке компаниялардың біріне айналды.
ChatGPT-дің артында тұрған жасанды интеллект компаниясы дүйсенбі күні кешке осы инвестициялық раундтан кейін компания құны 300 миллиард долларға бағаланғанын хабарлады. Бұл былтырғы қазан айындағы 157 миллиард доллармен салыстырғанда айтарлықтай өсім. Раундты жапондық SoftBank инвестициялық компаниясы басқарды. Ол OpenAI-мен бірге 500 миллиард долларлық Stargate жобасы аясында Oracle және өзге серіктестермен жұмыс істеп жатыр.
Инвестиция қалай бөлінеді?
The New York Times басылымының дереккөзіне сүйенсек, бұл инвестиция екі бөлікке бөлініп беріледі. Алдымен 10 миллиард доллар бірден берілсе, қалған 30 миллиард доллар 2025 жылдың соңына дейін беріледі.
Бұл қаржының 75%-ын SoftBank қамтамасыз етсе, қалғанын Microsoft, Thrive Capital, Coatue, Altimeter және басқа инвесторлар толықтырады.
OpenAI не дейді?
OpenAI бұл қаржы "ғылымдағы жаңалықтарды ашуға ықпал ететін, дербес білім беруді мүмкін қылатын, адам шығармашылығын арттыратын және бүкіл адамзатқа пайда әкелетін AGI (жалпы мақсаттағы жасанды интеллект) жолын салатын AI жүйелерін құруды жалғастыруға” мүмкіндік береді дейді.
Компания 2022 жылдың соңында ChatGPT-ді таныстырып, бүкіл әлемде жасанды интеллектке деген қызығушылықты арттырған еді. Қазір бұл чатботты аптасына 500 миллион адам пайдаланады.
OpenAI – әлемдегі үшінші ең қымбат жеке компания
OpenAI қазіргі таңда құны жағынан әлемдегі ең қымбат жеке компаниялардың бірі.
1-орын: SpaceX — $350 млрд
2-орын: ByteDance (TikTok иесі) — $312 млрд
3-орын: OpenAI — $300 млрд
Ол енді мынадай алыптарды басып озды:
Chevron — $294 млрд
Samsung — $263 млрд
Salesforce — $257 млрд
McDonald’s — $223 млрд
PepsiCo — $205 млрд
Тіпті Starbucks-тан ($111 млрд) үш есе қымбат болып тұр.
OpenAI 2015 жылы Илoн Маск және өзге инвесторлардың қолдауымен коммерциялық емес ұйым ретінде құрылған болатын. Маск кейінірек жобадан шығып кеткен соң, компания «шектеулі пайда» (capped profit) құрылымын қабылдады. Бұл жүйе арқылы компания коммерциялық бөлім ашып, қажетті инвестиция тартуға мүмкіндік алады.
