94 жастағы миллиардер-инвестор Уоррен Баффетт Berkshire Hathaway Energy жетекшісі Грег Абель жақын арада Berkshire Hathaway компаниясының бас директоры болатынын растады. 22 ақпан күні жарияланған акционерлерге арналған хатында Баффет көптен күткен мұрагерлік жоспарды тағы да атап өтіп, Berkshire-дің қаржылық көрсеткіштері мен инвестициялық шешімдерін баяндады.
Баффет – өзінің ашық әрі мазмұнды хаттарымен танымал. Жуырда жариялаған хатын шолып шығып, маңызды тұстарын атап өтуді жөн көрдік.
"Мен 94 жастамын әрі көп ұзамай Грег Абель менің орнымды басып, жылдық хаттарды жаза бастайды," – деп атап өтті Баффет. Ол акционерлерді Berkshire-дің ашықтық пен ұзақ мерізімге созылатын құндылыққа негізделген қағидалары жаңа басшылық кезінде де сақталады деп сендірді.
Berkshire Hathaway-дің ақша қоры $334 миллиардты құрады, бұл компания тарихындағы ең көп қолма-қол ақша соммасы. Бұл арқылы инвестордың нарықты тым қымбат деп бағалап, сақтық жасап отырғанын аңғаруға болады. Компания ағымдағы жыл құны $134 миллиардқа тең болатын акцияларын, оның ішінде басым көп бөлігі болатын Apple акцияларын сатты.
Алайда Баффет өз хатында компанияның қолма-қол ақшаны жинағаннан гөрі "жақсы бизнес" иеленуді қалайтынын атап өтті.
"Біз әрдайым капиталымыздың басым бөлігін акцияларға, соның ішінде Америка компанияларына саламыз, олардың едәуір бөлігі халықаралық қызметпен де айналысады," – деді ол.
Berkshire Hathaway $26,8 миллиард салық төлеп, АҚШ тарихында ең көп салық төлеген компаниялардың қатарына енді. Бұған байланысты "АҚШ тарихындағы маңызды рекорд жаңартылды" – деп атап өтті Баффет. Соңғы 60 жылда компания жалпы $101 миллиардтан астам салық төлеген.
Баффет бес ірі жапон компаниясы – Itochu, Marubeni, Mitsubishi, Mitsui және Sumitomo-ға салған инвестицияларын арттыруды жалғастыратынын мәлімдеді. 2019 жылы $13,8 миллиард көлемінде құйған инвестицияларының құны қазіргі таңда $23,5 миллиардқа жетті. Атақты инвестор бұл көрсеткіштің одан әрі өсетініне сенімді.
"Біз олардың қаржылық есептерін қарап, акциясы арзан саудаланып жатқанына таң қалдық," – деді Баффет. Berkshire-дің жапон компанияларына құйған инвестициясы Омаха жұлдызының ұзақ мерзімді, құндылыққа негізделген инвест-стратегиясы екенін айғақтайды.
Баффет өз хатында Америка экономикасының дамуы мен капитализмнің маңыздылығы туралы да ойын бөліседі. Баффет соңғы хаттарында саясат пен қазіргі оқиғалар туралы көп үн қатпайды. Дегенмен, АҚШ үкіметіне астарлы түрде:
"Күндердің күнінде Berkshire акционерлері сізге 2024 жылғыдан да көп салық төлеуге үміттенеді. Оны ақылмен жұмсаңыз. Өмірдің әділетсіздігіне тап болған жандарға қамқор болыңыз – олар бұдан да жақсы өмірге лайық. Сондай-ақ, тұрақты валютаны сақтап тұру қажет екенін қаперде ұстаңыз, бұл үшін даналық пен қырағылық қажет" – деді ол.
Хаттың толық нұсқасымен танысу үшін төмендегі файлды жүктеп алыңыз.
